ӘХМӘТҖАНОВ МӨҖӘҺИТ ЗАҺИТ УЛЫ
Мөслим лицееның татар теле һәм әдәбияты укытучысы
Белеме: югары, Казан дәүләт университеты, 1973 ел.
Квалификация категориясе: югары
Эш стажы: 39 ел
Татар теле һәм әдәбияты укытучысы булып: 19 ел
Дәүләт бүләкләре:
“Халык мәгарифе отличнигы”; “Татарстан Республикасы мәктәпләренең атказанган укытучысы", 2001 ел; Абдулла Алиш исемендәге премия лауреаты; Татарстан Язучылар берлеге әгъзасы, 1995 ел.
2010-2011 нче уку елы елъязмасы
Балалар өчен “Батыр буласым килә” исемле шигырьләр китабым Татарстан китап нәшриятында дөнья күрде.
Шагыйрә Лилия Садриеваның басылачак шигырьләр җыентыгына кереш сүз яздым.
”Яңа гасыр “радиосыннан даими рәвештә балалар өчен шигырьләрем һәм әкиятләрем яңгырап тора (язмалары бар).
Татарстанның атказанган җырчысы Зифа Басыйрова конкурсында катнаштым.
”Мәдәни җомга “ гәзитендә шигырьләрем басылды (26 нчы март).
Ф.САдриевның “Авылдан хатлар” китабын тәкъдир итү кичәсендә катнаштым һәм чыгыш ясадым (31 нче март).
Флера Харрасованың “Дөрес сөйләшү серләре “ исемле китабы басылып чыкты, ул китап нигездә минем шигырьләрдән генә тора.
”Яңа гасыр” телевидениесеннән мине “Китап” тапшыруында күрсәттеләр.
Чаллы шәһәрендә фольклор ансамбле белән йомгаклау концертында катнаштым.
“Ватаным Татарстан” гәзитендә кайбер әдәби әйберләр басылып чыкты.
Казанда Татарстанның 90 еллык уңае белән чыгыш ясадык.
”Көмеш кыңгырау”да 3 шигырем басылып чыкты.
Мөслимдә Т.Миңнуллин, Разил Вәлиев, Марсель Галиевләр белән очрашу булды. Мин чыгыш ясадым.
Түрештә Роберт Миңнуллин белән очрашу кичәсе булды . Мин чыгыш ясадым.
“Ватаным Татарстан”да мәкаләм басылып чыкты (11 нче август).
Актаныш районы Әгъбәз авылында минем белән очрашу булды (11 нче сентябрь).
Актанышта “Халкым чишмәләре” исемле фестивальдә катнаштым (25 нче сентябрь).
Яшь иҗатчыларның Зөлфәт клубы утырышларында даими рәвештә чыгышлар ясадым, укучыларның иҗатларын тикшердем.
Миңа Абдулла Алиш исемендәге премия тапшырдылар (14 нче октябрь).
Мөслим үзәк китапханәсендә шигырь бәйрәме үтте. Мин анда катнаштым һәм чыгыш ясадым (15 нче октябрь).
Әмәкәй белән Әлмәт авылларында Укытучылар елы уңае белән мәдәният хезмәткәрләре семинарында катнаштым (28 нче октябрь).
Иске Карамалы авылында әдәби очрашуда катнаштым (5 нче ноябрь).
“Ватаным Татарстан” да шигырьләрем һәм фотосурәтем басылып чыкты (26 нчы ноябрь).
Казанда Зифа Басыйрованың юбилей кичәсендә катнаштым (30 нчы ноябрь).
“Мәйдан” журналында балалар өчен шигырьләрем басылып чыкты (3 нче декабрь).
Район олимпиадасында 2 укучым призлы урыннар яулады: Тайбактин Вильям, татар теле - 2 нче урын, Габделхәев Мөхәммәт, татар теле - 2 нче урын.
“Мәгариф “ журналында шигырьләрем басылып чыкты (8 нче декабрь).
Мөслим сәнгать мәктәбендә минем белән әдәби һәм музыкаль очрашу булды (8 нче декабрь).
“Казан утлары” журналында шигырьләрем һәм фотом басылып чыкты (№12).
“Татарстан радиосына интервью бирдем (13 нче ноябрь).
Лицейда юбилей кичәм үтте (14 нче декабрь).
Мөслим радиосыннан минем турыда радиотапшыру булды (15 нче декабрь).
Район Мәдәният йортында юбилей кичәм үтте(17 нче декабрь).
“Мөслимнең шәрәфле гражданы” дигән исем тапшырдылар (25 нче декабрь).
“Мәгърифәт “ гәзитендә минем шигырьләр басылып чыкты( 29 нчы декабрь).
Чаллыда Якташлар җәмгыятендә очрашу булды. Мин чыгыш ясадым.
Татар көрәшенә багышланган шигырь конкурсында катнашып, республика күләмендә 2 нче урынны алдым (14 нче февраль).
Район үзәк китапханәсендә М.Җәлилнең 105 еллыгына багышланган әдәби кичәдә катнаштым һәм чыгыш ясадым.
Халыкара Туган тел көне уңаеннан Мөслим радиосыннын чыгыш ясадым (20 нче февраль).
Ф.Садриевның 70 яшьлек юбилее уңаеннан Казан радиосына интервью бирдем (2 нче март).
Фоат Садриев турында телевидениегә интервью бирдем (9нчы март).
Әлмәттә Клара Булатованың юбилей кичәсе булды. Мин шунда чыгыш ясадым (22 нче март).
Сарманда Фәйзулла Туишев исемендәге гармунчылар конкурсында катнаштык һәм лауреат исеме алдык( 26 нчы март ).
Республика пенсия фонды оештырган конкурста катнашып, 1 нче дәрәҗә Диплом белән бүләкләндем. (15 нче апрель).
Казанда Милли мәҗлес утырышында катнаштым (25 нче апрель).
Татарстан телевидениесенең “Җырлыйк әле” тапшыруында катнаштым (30 нчы апрель).
Казан телевидениесе минем турыда “Туган як” тапшыруы әзерләде. 19 нчы май көнне эфирга чыкты.
Шәхси сайты: http://mojahit.narod.ru
Үзе турында
Аның турында
Шундый матур кешеләр бар арабызда
Күңел күзегезне ачып карагыз ла…
Әлеге шигырь юлларының авторы нәкъ менә үзе турында да язадыр кебек. Балалар шагыйре, Татарстанның атказанган укытучысы, Абдулла Алиш исемендәге бүләк иясе, ике дистәдән артык китап, күпсанлы видеофильмнар, кинофильм, аудиоязмалар авторы, район советы депутаты, талантлы шәхес Мөҗәһит Әхмәтҗанов турында сүзебез.
укырга
Мөҗәһит Әхмәтҗанов 1950 нче елның 15 нче декабрендә Мөслим районы, Түреш авылында туган. 1968 нче елда Күбәк урта мәктәбен тәмамлый, 1968 - 1973 нче елларда Казан дәүләт университетының татар теле һәм әдәбияты бүлегендә югары белем ала. Үз теләге белән Ерак Көнчыгышта 2 ел хәрби хезмәттә була. Аннан соң 6 ел дәвамында район комсомол, партия комитетларында эшли. 1982 нче елдан Мөслим урта мәктәбенә директор итеп билгеләнә. 1995 нче елга кадәр шул вазифаны алып бара. Мәгариф өлкәсендәге казанышлары өчен "Халык мәгарифе отличнигы", 1996 нчы елда “Татарстан Республикасы мәктәпләренең атказанган укытучысы “ дигән исемнәргә лаек булды, югары квалификацион категориягә ия. 1995 нче елдан Татарстан Язучылар берлеге әгъзасы. 2007 нче елда “Россиянең иң яхшы кешеләре” китабына кертелде. 2010 нчы елда Абдулла Алиш исемендәге премия лауреаты булды.
Мәктәптә укыган чакта ук ул балалар матбугаты: “Яшь ленинчы” (хәзерге”Сабантуй”) газетасы һәм “Ялкын” журналы битләрендә шигырьләре белән катнаша башлый.. Бүген ул 2 дистәдән артык китап авторы. “Очты, очты...” һәм “Акыллыга сүз әйттем” китаплары “Ел китабы” конкурсында икесе дә икенче урынга лаек булды. 2007 нче елда “Рухият” фонды тарафыннан үткәрелгән “Балаларга бүләк” конкурсында Мөҗәһит Әхмәтҗанов профессиональ язучылар арасында лауреат исеменә лаек булды.
“Мөҗәһит шигырьләре артында тагын бер кешенең җылы сулышын тоймый мөмкин түгел. Бу сулыш – Укытучы сулышы. Ул күзгә күренеп тормый, әмма аны тоймый калып та булмый. Нәни геройларның, укучы балаларның һәр сүзендә, тәртибендә, табигатькә, яшәешкә мөнәсәбәтендә әнә шул укытучының сүзе, тәртибе, мөнәсәбәте дә чагыла төсле. Шулкадәр матур, самими һәм табигый багланышны, берлекне бары тик чын шагыйрь, чын укытучы да булган кеше генә күрсәтеп бирә ала” дип яза Татарстан Яучылар берлеге әгъзасы Галимҗан Гыйльманов.
Мөҗәһит Әхмәтҗанов гарәп хәрефләрен өйрәнүчеләр өчен “Күңел нуры”, “Гарәп графикасы нигезендә элекке татар язуы” исемле уку әсбаблары, туган авылы Түреш турында тарихи очерк һәм Мөслим төбәгеннән чыккан каләм ияләре турында биографик белешмә, Мөслим районындагы фольклор ансамбльләре турында “Мөслимем җәүһәрләре”, Мөслим авылындагы мәчетләр, мәдрәсә, мәктәпләр тарихына багышланган “Кыңгыраулы мәктәп еллары”, үзе урта белем алган Күбәк авылы һәм аның мәктәбе тарихына багышланган “Күбәгем-туган төбәгем” исемле китаплар авторы буларак та укучыларга билгеле.
Мөҗәһит Әхмәтҗанов - "Мөслим тугайлары" исемле халык фольклор ансамбленең алыштыргысыз музыканты. Казан, Чебоксар, Түбән Новгород шәһәрләрендә үткән фольклор фестивальләрендә төрле уен коралларында соклангыч чыгыш ясады. Ул республикабызның төрле районнарында, Чаллы, Азнакай, Зәй, Казан шәһәрләрендә үткән әдәби очрашуларда әледән–әле катнаша, мастер-класслар күрсәтә. "ОРТ", "Яңа гасыр" каналлары оештырган “Кайда син, насыйп ярым?” телевизион тапшыруында катнашып, чыгыш ясады.
Мөҗәһит Әхмәтҗанов якташ җырчыбыз Зифа Басыйрова турындагы китапны әзерләүдә, материаллар туплауда зур булышлык күрсәтте. “Яңа гасыр”, Яр Чаллы телеканалы аша шагыйрь турында “Китап”, “Йолдызлар балкышы” серияләрендә тапшырулар күрсәтелде.
Шагыйрь үзенә лаеклы алмаш та әзерли. Лилия Шәймиеваның шигырь китабы басылып чыкты, Айсылу Акмалова–Сәлимова Яр Чаллы шәһәрендә нәшер ителүче “Көмеш кыңгырау” гәзитендә баш мөхәррир урынбасары, шигырьләре әледән-әле басылып тора. Ләлә Мөхәммәтшинаның иҗат җимешләре коллектив авторларның “Яшь дулкын” исемле китабында басылып чыкты, Зөлфәт клубы оештырган конкурста 1 нче урынны алды. Мөҗәһит районыбызда иҗат итүче яшьләр белән тыгыз элемтәдә тора, үз киңәшләрен бирә, язмаларына рецензияләр әзерли.
Бүгенге көндә “Мөҗәһит Әхмәтҗановның шәхси сәхифәләре” дигән үз сайты эшләнеп ята. Анда әдипнең шигырьләре, шәҗәрәләре, тугралары һәм фотокүргәзмәсе урын алачак. Аның тарафыннан Мөслим мәктәбе турында видеокитап эшләнде. Ул даими рәвештә “Ватаным Татарстан”, “Мәдәни җомга”, “Сабантуй”, “Көмеш кыңгырау” гәзитләре, “Мәйдан”, Ялкын”, “Салават күпере” журналлары белән язышып тора. Район, лицей күләмендә үтә торган төрле чараларга шигъри текстлар яза.
Мөҗәһит Әхмәтҗанов бәхетле, үрнәк гаиләсенең тоткасы да. Шагыйрь әнисе Җүәйрә апа да әлеге гаиләдә гомер кичерә. Һәрьяктан да камил зат, “Татарстанның атказанган укытучысы” Бания Тимерхан кызы белән 3 ул тәрбияләп үстерделәр. Алмаз-югары белемле юрист, “Татфондбанк”та эшли. Азат –югары белемгә ия, администрациядә эшли, яшьләр һәм спорт бүлеген җитәкли. Айдар-Казан консерваториясенең баян классында 4 нче курс студенты, төрле конкурсларда күп мәртәбәләр лауреат исеменә лаек булды. Киленнәре Лилия белән Мөршидә җырга-моңга гашыйклар, икесе дә өздереп җырлыйлар. Беренче оныгы Булат 3 нче сыйныфта белем ала, музыка мәктәбенә йөри, курай, баян, сорнайда уйный. Икенче оныклары Алинә балалар бакчасына йөри, шигырьләр сөйли, инде үзенең җырлары белән конкурсларда катнаша башлады.
Мөслим лицее бәхетле: көн саен шагыйрь белән очрашып яшибез. Укытучы-шагыйрь көн саен мәктәптә. Әдәбият дәресләрендә балалар бергәләп шигырь серләренә өйрәнәләр, шигырь язалар.
Тыйнаклыкның, зирәк акыллылыкның өлгесе ул - Мөҗәһит Әхмәтҗанов.. Аңа нинди генә мактау сүзләре әйтсәк тә, әйтеп бетереп булмас кебек. Чөнки табигать, Ходай аңа сәләтнең барысын да: ихласлылык, ачык күңеллелек, ярдәмчеллек, тормышны чиксез ярату кебек сыйфатларны өеп биргән, кешеләрне сокландыра торган асыл затларның берсе итеп яраткан. Хөрмәтле Мөҗәһит Заһитович! Сезне 60 яшьлек юбилеегыз белән тәбрик итәбез. Тормышыгызда һәм эшегездә уңышлар, шатлыклы, бәхетле көннәр юлдаш булсын. Киләчәктә дә илһамланып иҗат итәргә язсын Сезгә.
Мөслим лицееның татар теле һәм әдәбияты укытучылары Чулпан Ситдыйкова, Алсу Латыйпова.
|
